ဘလောက်၏ ရည်ရွယ်ချက်





this is not a news blog



this is a Thinking Blog




နိုင်ငံရေးလောကမှာ "အတွေးအခေါ်" ဆိုတာအရေးကြီးလှပါတယ်။ နိုင်ငံရေး အတွေးအခေါ်ပေါ် မူတည်ပြီး နိုင်ငံရေး "အသိ" ဖြစ်ပေါ်ပြီးနိုင်ငံရေး "အသိ" ကမှတ ဆင့် နိုင်ငံရေးယုံကြည်ချက - Political Conviction ဆိုတာ အတွင်းစိတ်မှာ မွေးဖွားခွင့်ရကြပါတယ်။ နိုင်ငံရေးယုံကြည်ချက်ပြင်းမှ နိုင်ငံရေးတိုက် ပွဲတိုက် ပွဲပြင်းထန်လာရင် ခံနိုင်ရည်ရှိပါတယ်။
ကျနော်တို့ဗမာနိုင်ငံဟာ ရာစုနှစ်ဝက်နီးနီးစစ်အာဏာရှင်တစုရဲ့ နိုင်ထက်စီးနင်း မတရားကျင့်ခြင်းကို ခံနေကြရတဲ့အတွက် မျက်စိကိုပိတ်အတွေးကိုပင်ချုပ်ထိန်းထားခဲ့တာကြောင့် "အတွေး" နယ်ပယ်မှာ ရှင်သန်ခွင့်မရခဲ့ကြရရှာဘူး။ ဒါကြောင့် (၂၁) ရာစုခေတ် ဒီမိုကရေစီခေတ်မှာတောင် ဒီမိုကရေစီကို တကယ်နားလည်လို့ တကယ်ယုံရင် ဒီမိုကရေစီမှာ အတိုက်အခံ (Opposition) ဆိုတာကိုလက်ခံရမှာဘဲ။ အာဏာရှင်စံနစ်သို့ မကျဆင်းရလေအောင် Check & Balance လို့ခေါ်တဲ့ တိမ်းကွပ်မှုနဲ့ မျှတမှုရှိရလေအောင် အတိုက်အခံကိုတမင် ရှင်သန်ခွင့် ပေးရပါတယ်။ အတိုက်အခံရှိရင် ဆန့်ကျင်ဖက် အတွေးအခေါ်ဆိုတာရှိစမြဲပါ။ ဆန့်ကျင်ဖက်အတွေးအခေါ် ရှင်သန်ဖို့ Critical Thinking လို့ခေါ်တဲ့ ပိုင်းခြားဝေဖန်တတ်တဲ့ အတွေးအခေါ်ရှိမှ Tolerance လို့ခေါ်တဲ့ သည်းချည်းခံစိတ် မိမိရဲ့ ဆန့်ကြင်ဖက်ကို နားထောင်လက်ခံစိတ်တွေဝင်ပြီး ငါ့ပါတီ-ငါ့ခေါင်းဆောင် ငါ့အယူဝါဒသာမှန်ဆိုတဲ့ "ငါ" ဆိုတဲ့ မာနတွေ အာဏာရှင်စိတ်ဓါတ်တွေကို တိုက်ခိုက်နိုင်ပါမယ်။
ကြိုက်သည်ဖြစ်စေ မကြိုက်သည်ဖြစ်စေ ကျနော်တို့ ဗမာနိုင်ငံမှာ ကွန်မြူနစ်အယူဝါဒဟာ လွတ်လပ်ရေးတိုက်ပွဲ အချိန်ကာလအတွင်းက သြဇာညောင်းခဲ့ပါတယ်။ ပိုဆိုးတာက ဗမာပြည် ကွန်မြူနစ်ပါတီရဲ့ခေါင်းဆောင်အများစုဟာ ယနေ့ခေတ်စကားနဲ့ ပြောရရင် ၀ါဒရေး (Taliban) တွေဖြစ်ကြတယ်။ ၀ါဒရေး အစွမ်းရောက်ခဲ့ကြလို့ ဖြုတ် ထုတ် သတ်လူသတ်ပွဲကိုဆင်နွှဲခဲ့ကြပြီး နောက်ဆုံး ပန်ဆောင်က ရေကူးပြေးခဲ့ရတဲ့ ဘ၀နဲ့ အဆုံးသတ်ခဲ့ကြရတယ် မဟုတ်ပါလား။ ရလာဒ်က လူကြီးတွေရဲ့တယူသန်အတွေးအခေါ်ဟာ ယနေ့ယူငယ်တွေကို ရိုက်ခတ်လျက်ရှိတုန်းဘဲ။ ဒီကွန်မြူနစ်တွေရဲ့ တယူသန်လွှမ်းမိုးမှုကို မဆလစိတ်ဓါတ်နဲ့ ပေါင်းစပ်ပေးလိုက်တော့ အတွေးအခေါ် ရွာလည်တဲ့ဘ၀ ရောက် ခဲ့ကြရတယ် မဟုတ်လား။ ဒို့လူကြီးတွေ ဒို့ပါတီ ဒို့ဝါဒကိုမထိနဲ့ ဒို့ခေါင်းဆောင်ကိုမဝေဖန်နဲ့ ဒို့နဲ့မတူတဲ့သူအားလုံးဟာ ဒို့ရန်သူ ဖေါက်ပြန်သူတွေဆိုတဲ့ အတွေးအခေါ်ဟာ အာဏာရှင်စံနစ်ကို အခြေခံတဲ့ ကွန်မြူနစ် Taliban နဲ့ မဆလအတွေးအခေါ်တွေက ဆင်းသက်လာကြတာပါ။ မဆလ ဆိုတာကလဲ စစ်အာဏာရှင်စံနစ်ကို တည်ထောင်နိုင်အောင် ကွန်မြူနစ်စံနစ်ကို ခိုးချထားတဲ့ ကွန်မြူနစ်ရောချော စံနစ်ပေဘဲမဟုတ်ဘူးလား။

ဒီရွာလည်နေတဲ့ တဖက်စွန်းရောက်နေတဲ့ ခေတ်နောက်ဆွဲနေတဲ့ "အတွေးအခေါ်" တွေကိုတိုက်ခိုက် ချွပ်နိုင်ဖို့အတွက် Critical Thinking ဝေဖန်ပိုင်းခြားမှု အတွေးရှိဖို့လိုပါတယ်။ အထူးသဖြင့် နောင်တချိန်နိုင်ငံကို ခေါင်းဆောင်ကြမဲ့ လူငယ်တိုင်းတွေကို "သိ" စေချင် "ရှိ" စေချင်ပါတယ်။ ဒီမိုကရေစီ ရပြီးတိုင်းပြည်ထူထောင်ရမဲ့ အချိန်မှာလည်း ဒီမိုကရေစီရင်သန်ရေးအတွက် ဒီ Critical Thinking ဟာ အထူးလိုအပ်ပါတယ်။
ဒီစေတနာအရင်းခံတာကြောင့် သတင်းထက် "အတွေးအခေါ်" ကို ဒီ BLog မှာ ဦးစားပေးထားပါတယ် ဆိုတာကို ကနဦး သိစေချင်ပါတယ်။

ဦးကျော်ငြိမ်းနဲ့ သခင်သန်းထွန်းတို့ဟာ ၀ါဒဆွဲနဲ့ ဖဆပလအတွင်းမှာ အားပြိုင်ခဲ့ကြတယ်။ ဗိုလ်ချုပ်အောင်ဆန်းက ၀ါဒအဆွဲမထားဘဲ အမျိုးသားရေးNationalism နဲ့ လွတ်လပ်ရေးကိုဘဲ အရေးစိုက်ခဲ့တဲ့အတွက် ဦးကျော်ငြိမ်းကိုရော သခင်သန်းထွန်းကိုရော စုစည်းပြီး ဖဆပလကြီးကို ထောင်နိုင်ခဲ့တယ်။ ၀ါဒဆွဲပါလာရင် ငါ့လူ သူ့လူ ငါနဲ့မတူ ရန်သူဆိုတဲ့ မာနစိတ် အမြင်ကျဉ်းစိတ်တွေဝင်လာတတ်ပါတယ်။ ဗိုလ်ချုပ်အောင်ဆန်းက Exclusive လို့ခေါ်တဲ့ လူတိုင်းကို တိုင်းပြည်အတွက် စေတနာရှိရင် သူ့နေရာနဲ့သူ ပါဝင်စေတဲ့အတွက် ဖဆပလ ဟာအင်အားကြီး ထွားလာပြီး နောက်ဆုံးလွတ်လပ်ရေးကို အရတိုက်ပွဲယူနိုင်ခဲ့တယ်။ လူတိုင်းပါဝင်မှုကို လက်ခံနိုင်ဖို့က Tolerance သည်းခံမှုနဲ့ Critical Thinking ဝေဖန်ပိုင်းခြားတွေးခေါ်မှုမရှိဘဲ မရနိုင်ပါ။

ဗိုလ်ချုပ်အောင်ဆန်းရဲ့ လမ်းစဉ်ကို အတုယူ အခြေခံပြီး အားလုံးပါဝင်ပြီးတိုင်းပြည်အတွက် တက်ညီလက်ညီ တိုက်ပွဲဝင်စေချင်ပါတာက ဒုတိယ စေတနာပါ။
ကျနော့်ကို ဦးကျော်ငြိမ်းသားဆိုပြီး ၀ါဒဆွဲနဲ့ လူကိုမသိ မကြည့်ဘဲ တဖက်သတ် အမုန်းပွားလိုသူတွေရှိ မယ်ဆိုတာ မျှော်လင့်ပြီးသားပါ။ ကျနော့်စာကိုဖတ်ပြီး ကျနော့်အတွေးကို သဘောပေါက်ပြီး ငါနဲ့မတူဖူးဟေ့ ! လို့ သဘောပေါက် လက်ခံရင်ဘဲ။ ကျနော်ကြိုးစားရ ကျိုးနပ်ပါပြီ။ မတူတဲ့ အတွေးအခေါ်ရှိတယ်ဆိုတာ သဘောပေါက်ခြင်းဟာ Critical Thinking ရဲ့အစပါဘဲ။

ကျနော့်အတွေးအခေါ်တိုင်းဟာ "အမှန်" ချည်းဟု မယူဆနိုင်ပါ မှားတယ်ထင်ရင် ပြင်နိုင်ပါတယ်။ ကျနော်နားထောင်ဖို့ ၀န်မလေးပါ။ အတွေးအခေါ်တခုဆိုတာ လေ့လာမှုအသိဥာဏ်က ဖြစ်ဖျားတည်လာတာပါ။ အသိဥာဏ်ပိုလာရင် အတွေးအယူအဆလဲ အပြောင်းနိုင်ပါတယ်။ ဒါကြောင့် ဆွေးနွေးစရာရှိရင် ဆွေးနွေးနိုင်ပါတယ်။ bnyein@gmail.com ဟာ ကျနော်ရဲ့ အီးမေးပါ။ ပွင့်လင်းမှုကို အခွင့်အရေးယူပြီး ဆဲစာဘဲပို့ခဲ့ရင် ပို့သူကိုသာ သနားမိပါတယ်။ ကျနော်လျစ်လျူရုံယုံသာရှိပါတယ်။ ဒီမိုကရေစီကို တကယ်ယုံသူမို့ အတိုက်အခံ ဆန့်ကျင်ဖက်ကို လက်ခံနိုင်ပါတယ်။
စာဖတ်သူတို့ ပျော်ရွှင်ချမ်းမြေ့အသိတိုးပွားကြပါစေ။

No comments:

Post a Comment