ကျနော်၏ ယုံကြည်ချက်

ကျနော်၏အမြင်အရ နိုင်ငံရေးရဲ့အသက်ဟာ “ယုံကြည်မှုဖြစ်တယ်။ ဒီမိုကရေစီ မထွန်းကားသည့် နိုင်ငံများတွင် နိုင်ငံရေး ဖိနှိပ်မှုသည် ဒွန်တွဲလျက်ရှိစမြဲပင်။ နိုင်ငံရေးလုပ်မိသည်နှင့် နိုင်ငံရေးသမားတဦး အတွက်ဦးတည်ရာ သည် အကျဉ်းထောင်နှင့် နှိပ်စက်ညှင်းပန်းမှုပင်ဖြစ်သည်။ စစ်အာဏာရှင် လက်အောက်တွင် နိုင်ငံရေးသမား၏ ဘ၀သည် ထောင်နခမ်းတွင် ဇင်းချန်လျောက်ခြင်း ပင်ဖြစ်သည်။ စစ်အာဏာတို့၏ ညှင်းပန်းမှုကို ခံနိုင်ရန် ယုံကြည် ချက် ကြောရိုးရှိရပေမည်။ ထို့ကြောင့်နိုင်ငံရေး ယုံကြည်ချက်သည် အဓိက ကျလှပေသည်။


ကျနော်တို့မိသားစု တွင် အဖေသည် သွေးစွန်းသည့် အကျီင်္နှင့် အိမ်ပြန်ခဲ့ရသည်။

အမေသည် ရေကြည်အိုင်တွင် တစ်နှစ်ခွဲ၊ ကျနော်၏ အကို ဒေါက်တာထွန်းကျော်ငြိမ်းနှင့် ကျနော်တို့သည် ဦးသန့်အရေးအခင်းတွင် ခေါင်းဆောင်မှုနှင့် ထောင်ဒဏ် (၇) နှစ်ကျ၍ (၅) နှစ်ထောင်နန်းစံ ခဲ့ရသည်။ အမဖြစ်သူ ဒေါ်ချိုချိုကျော်ငြိမ်းသည် ထောင်အကြိမ်ကြိမ် ကျခဲ့ရ သည်။ ခံယူချက် ယုံကြည်ချက်အကြောင်း လက်တွေ့ကြုံခဲ့သူများဖြစ်သည်။

ကျနော်တို့ မိသားစု အဆက်ဆက် အဖေသွေးမြေကျကာ သွေးစွန်းနှိပ်စက်မှု ခံခဲ့ရသော်လည်း (ဦး) မကျိုးခဲ့ပါ။ ကျနော် ဂုဏ်ယူသည်။ ယုံကြည်ချက် ပြင်း၍ တိုင်းပြည်နှင့် လူမျိုးအတွက်ဆိုသည် နိုင်ငံရေး (မာန်) ပြင်းခဲ့ကြ၍ ဖြစ်သည် ကျနော်တို့အားလုံး ယုံကြည်ကြသည်မှာ လူ့လွပ်လပ်ခွင့်နှင့် ဒီမိုကရေစီပင်ဖြစ်သည်။ အဓိကအားဖြင့် လစ်ဖရယ် ဒီမိုကရေစီ Liberal Democracy ဖြစ်သည်။

ကွန်မြူနစ်တို့ ရောကျော်အော်နေသည့် “ပြည်သူ့ဒီမိုကရေစီ” နှင့်သော်လည်းကောင်း မဆလတို့၏ “ဆိုရှယ်လစ် ဒီမိုကရေစီ”နှင့် သော်လည်းကောင်း နအဖတို့၏ စီးကမ်းရှိသောဒီမိုကရေစီ Discipline Democracy တို့နှင့် လုံးဝ မတူပါ။ ၄င်းတို့အားလုံးမှာ အာဏာရှင် စံနစ်ကို ဒီမိုကရေစီ သကာလောင်းထားခြင်းပင် ဖြစ်သည်။ ကျနော်ယုံကြည်သော လစ်ဖရယ်ဒီမိုကရေစီဆိုသည်မှာ ပြည်သူကရွေးချယ်သည့် အစိုးရ -ပြည်သူကို တကယ် ကိုယ်စားပြုသည့် Representative Government ဖြစ်ရမည်။

တရားဥပဒေအုပ်စိုးသည့် Rule of Law ကိုလိုက်နာ သည့် အစိုးရဖြစ်ရမည်။ လွတ်လပ်သော တရားရေးစံနစ် Independent Judicial System ဖွံ့ဖြိုးလိုက်နာသည့် စံနစ်ဖြစ်ရပေမည်။ နောက်ဆုံး အများပြည်သူ၏ လွတ်လပ်ခွင့်ကို လေးစား၍ အများတိုးတက်ခွင့်ကို ဖော်ထုတ်နိုင် မည့် Free Market Economy ဈေးကွက်စီးပွားရေးကို ကျင့်သုံး၍ တိုင်းပြည်ထူထောင်ရန် ဖြစ်သည်။ တော်လှန်ရေးကောင်စီနှင့် မဆလစံနစ်အောက်တွင် ကြီးပြင်းခဲ့သူဖြစ်၍ အာဏာရှင်မှန်သမျှ (လက်ဝဲ- လက်ျာ- ပစ္စည်းမဲ့- စစ်) အာဏာရှင် စံနစ်အားလုံး ကို ဆက်စုတ်မုန်းတီး မိသည်။

လူငယ်ဘ၀ ကြီးပြင်းကာစ စာဖတ်စ ကာလတွင် အဖေ့ကို ဒီမိုကရေစီနှင့် ပတ်သတ်၍မေးဘူးသည်။ အဖေက စိတ်ရှည်လက်ရှည် ရှင်းပြရှာသည်။ ဒီမိုကရေစီကို ယုံရင်စိတ်ဓါတ်ကျစရာ မရှိ။ ဒီရွေးကောက်ပွဲ ရှုံးရင် နောက် (၄) နှစ်မှာ ထပ်ကြိုးစားရမှာပေါ့။ ပြည် သူရဲ့ ဆန္ဒကို လေးစားရမယ်။ တိုင်းပြည်အတွက် စေတနာမှန်ရင် တိုင်းပြည်အတွက် အကျိုးပြုခွင့် ရရမှာပေါ့ လို့ ရှင်းပြရှာတယ်။


ကျနော် ဒီမိုကရေစီကို ယုံတာ ခေတ်ပေါ်မို့လို့ ကြားစကားကြောင့် ယုံကြည်ရခြင်း မဟုတ်ပါ။ ဘ၀နှင့် ရင်းပြီး ထောင်ထဲမှာ ဂန်ဖလားကို ဖက်ရင်း ရလာတဲ့အသိကြောင့် ယုံကြည်ရခြင်းဖြစ်ပါသည်။ ထို့ကြောင့် ဤဘလောက်ဆိုဒ်တွင် ကျနော်ယုံကြည်မှုနှင့် အထင်အမြင် အတွေးအခေါ် အတွေ့အကြုံများကို အခါသင့် သလို ထုတ်ဖော်ဆွေးနွေးသွားပါမည်။

စာဖတ်သူများကို လေးစားလျက်
ပညာဗဟုသုတ ချမ်းမြေ့ ကြွယ်ဝကြပါစေ။
ဘိုဘိုကျော်ငြိမ်း
ဇန်န၀ါရီ ၂၀၀၈

No comments:

Post a Comment